skaapland south africa

Gehalte vleis by Skaapland

Vleis Emporium voldoen aan verbruiker se behoeftes

KAPENAARS kan hulle gereed maak vir ‘n unieke inkopie-ervaring by die indrukwekkende Skaapland Vleis Emporium van 1 000 m2 wat vandeesweek sy deure agter die High Street-kompleks in die Tygervallei-omgewing oopgemaak het. Die Skaapland Vleis Emporium bied aan verbruikers die geleentheid om hoë gehalte-vleis vars van die plaas te koop. Volgens die mede-eienaar, mnr. Pieter Burger, wat aan die stuur van sake sal staan, is die aansienlike belegging deur vyf plaaslike sakemanne gemaak, aangesien hy en sy vennote gevoel het dat die kieskeurige koper in die Wes-Kaap al lankal die verskeidenheid en gehalte verdien, wat die Skaapland Vleis Emporium aanbied. “Ons wil aan verbruikers die beste vleis en fynproewersprodukte teen die beste gehalte bied en terselfdertyd onoortreflike diens lewer. “Ons voel dat verbruikers daarop geregtig is om produkte aan te koop wat aan internasionale standaarde van gehalte en gesondheid voldoen,” het Burger, wat op ‘n skaapplaas in die Vrystaat grootgeword het, gesê. Burger het ‘n suksesvolle loopbaan in die korporatiewe sektor vaarwel geroep het om hierdie unieke konsep te vestig en te ontwikkel. Die oorspronklike Skaapland Slaghuis, een van die grootste slaghuise in die land, is drie jaar gelede deur mnr. Henk Snyman in Upington in die Noord-Kaap begin na breedvoerige bedryfsnavorsing in Suid-Afrika , Europa en die Verenigde Koningkryk. Die slaghuis het reeds by baie Suid-Afrikaners sinoniem geword met vleis en biltong van die hoogste gehalte. Die Noord-Kaapse Skaapland was ook die eerste slaghuis in die land wat ‘n wynlisensie bekom het.

Passie vir diens

By die Skaapland Vleis Emporium is vriendelike en persoonlike diens aan die orde van die dag. Gekeurde personeel het reeds voor die opening intensiewe opleiding in Upington ondergaan. Aandag is gegee aan verskeie aspekte vanaf teoretiese kennis en praktiese afronding tot verbruikerskontak. Internasionale vleismeesters en deskundiges sal deurgaans ingeroep word om verdere indiensopleiding te verskaf om te verseker dat die personeelstandaarde ook van wêreldgehalte is. “Ons wil aan al ons kliënte die diens gee waarop hulle geregtig is. “Skaapland se 30 personeellede is opgelei om verbruikers raad oor snitte en voorbereidingsmetodes te verskaf, en kliënte kan selfs by ‘n persoonlike blokman aanklop vir praktiese inligting. “As ‘n verlangde snit nie op die rak is nie, sal ons personeel uit hulle pad gaan om seker te maak dat ons dit kan voorsien. “Aangesien personeel een van die belangrikste skakels in die suksesketting is, kyk ons goed na ons werkers deur mededingende salarisse, heeltydse aanstellings, pensioenfondse en maandelikse vleistoelae aan te bied. “Personeel moet trots op hulle werkplek wees,” het mnr. Pieter Burger, bestuurder, gesê. Volgens Burger is dit vir hulle van kardinale belang dat die personeel opgelei word om aan kliënte uitmuntende diens te verskaf. “Ons wil hê dat Skaapland ‘n verbruikersvriendelike inkopie-ervaring vir enige kliënt moet wees. Dit moet eintlik ‘n gesinsuitstappie word waaraan ma, pa en die kinders kan meedoen. “Terwyl die ma’s hul snitte vir aandete by ‘n persoonlike blokman bespreek, kan die kinders rooiworsies by die toonbank eet.”

Higiëne en gesondheid

Volgens mnr. Henk Snyman, stigter van die alombekende Skaapland Upington, wat onlangs deur Business Partners SA as een van die topvyf slaghuise in die land aangewys is, het hy besef dat die dae van klein slaghuise met vleisreuke verby is, maar dat hy terselfdertyd supermarkte te onpersoonlik gevind het. “Ek wou ‘n slaghuis begin wat persoonlike kontak tussen die verbruiker en die personeel bevorder, van unieke verkoopstegnieke gebruik maak en onder die hoogste higiëniese standaarde net die beste gehalte-vleis aan kliënte sal verskaf.” Alle slaggoed wat Skaapland aanbied, word net op natuurlike voedsel grootgemaak en geen genetiese ingryping word gebruik om die diere onnatuurlik vet te maak nie. Beeste word onder meer in voerkrale grootgemaak om die sagste vleis te verseker. Beide die voerkrale en die abattoire voldoen aan die streng keuringsvereistes van ISO 2000 Europese standaarde wat daar gestel is vir die beheer en kontrole oor die voedingsproses en gesondheid. Alle Skaaplandse rooivleis kom direk uit die hartjie van die Noord-Weste vanaf verskaffers wat aan streng keuringsriglyne onderwerp is en deurentyd aan die hoogste vereistes moet voldoen. Vanaf die slag tot die verpakkingsproses word die mees optimale temperature gehandhaaf om te verhoed dat die koue ketting (die handhawing van verkoelingsvlakke) verbreek word. Na slagting word die vleis onder optimale temperature vervoer en selfs in verkoelde omstandighede verwerk. In Skaapland word die vleis in spesiaal-ontwerpte koelkaste eerder as in die normale, oop vertikale yskaste uitgestal ten einde optimale verkoeling te verseker. Skaapland beskik ook oor ‘n unieke instapkoelkamer waar kliënte hulle eie karkasse kan uitsoek en snitte volgens persoonlike smaak onder toesig laat opsaag. Die sterilisasieprosesse en metodes wat in die indrukwekkende 1 000 m2 emporium gebruik word, verteenwoordig slegs die jongste tegnologie wat in Europa beskikbaar is. Die skoommaaktoerusting word uit Switserland ingevoer en bestaan uit ‘n unieke stelsel wat onder hoë druk en korrekte temperature alle vet en verwante afval van die vleisverwerkingsproses oplos en van alle oppervlaktes verwyder.

Verskeidenheid is die wagwoord

Skaapland bied ‘n verskeidenheid van produkte wat selfs aan die mees oordeelkundige verbruiker se behoeftes sal voldoen. “Of jy nou net tuis wil braai, ‘n smaaklike gesinsete wil voorsit of vir ‘n uithanggeleentheid moet regstaan, is Skaapland die antwoord,” belowe die bestuurder. Topgehalte-vleis, ‘n deli met watertand plaaslike en ingevoerde lekkernye sowel as vars blomme en groente is daagliks beskikbaar. Sodra die aansoek vir ‘n wynlisensie goedgekeur word, sal die emporium die hele spektrum van spyseniering dek. Kapenaars kry vir ‘n slag weer toegang tot tradisionele Suid-Afrikaanse geregte soos Kalahari-oesters (lewer in netvet), skoongeskraapte afval, skaapkoppe, outydse kerriesosaties gestop met spek en perskes en smul-lekker kerrietjops. Terselfdertyd kan fynproewers hulle ook verlustig in die indrukwekkende deli met ‘n wye verskeidenheid klaarvoorbereide geregte sowel as smullekker Mediterreense geregte, plaaslike en ingevoerde koue vleise en kase. Heerlike plaasvars brode en quiches word daagliks gebak. Internasionale lekkernye soos Parmaham, Italiaanse en Duitse salamis en gerookte Noorweegse salm is ook beskikbaar, terwyl Skaapland se opgeleide vleismeester by hulle eie vervaardigingsaanleg plaaslike kouevleise voorberei. Vir die meer gesondheidsbewuste kliënt is daar ‘n groot verskeidenheid hoender- en maer varkvleisprodukte om van te kies en te keur. Skaapland spog ook met ‘n unieke biltongwiel waarmee biltong op ‘n baie natuurlike wyse gedroog word. Industriële waaiers sorg vir optimale lugvloei en stel Skaapland in staat om tonne van die lekkerste bees- en wildsbiltong te maak. Die biltongwiele is eie aan Skaapland en is deur die oorspronklike Skaapland-stigter ontwerp. Die Boerewors-koningin Flick du Toit verklap vir die eerste keer haar geheime resep vir kampioen-boerewors en geurige droëwors slegs vir die genot van Skaapland-kliënte. Spesiale braaipakke kan vir funksies verpak word en heel lammers en speenvarke is beskikbaar. Een van die spesialiteite is heel ontbeende lam wat gerol en gemarineer word vir oond- en spitbraai, wat ideaal is vir die feesseisoen.